Setenta comercios ofrecerán descontos este sábado na VI Noite Aberta

A Noite Aberta chega este sábado á súa sexta edición coa participación dun total de 70 comercios locais, un acto que ademais pretende marcar o comezo das festas de San Froilán. Os negocios poderanse identificar facilmente, xa que terán colocado enfronte dos seus locais unha alfombra rosa, e ofrecerán produtos rebaixados desde as 17.00 horas ata as 00.00.

Esta iniciativa, como o seu nome indica, consiste en que as tendas amplían o seu horario para que a xente teña máis tempo de aproveitar os descontos que se realizan ao longo do día. Ademais, a xornada amenizarase con multitude de actividades, como actuacións musicais ou exhibicións de baile.

DESFILE. Do mesmo xeito que en edicións anteriores, na Praza Maior volverase a celebrar o Gran Desfile de Moda, a partir das 17.30 horas. A encargada de presentalo será a cantante lucense que participou en Eurovisión representando a España, Lucía Pérez.

Os comercios aproveitarán esta ocasión para presentar as novas tendencias que terán nas súas tendas para a tempada de outono-inverno.

ás 22.00 horas celebrarase o fin de festa, que comezará cun chupinazo. Neste momento a praza encherase de baile, actuacións musicais e moitas sorpresas que os organizadores non quixeron desvelar, pero que prometen que non deixarán a ninguén indiferente.

Como colofón final, a Tuna de Lugo será a encargada de pechar o evento.

A parte destas actuacións, durante a duración do evento as rúas da cidade encheranse de música, sobre todo en Rúa Nova, onde estarán a amenizar a xornada un DJ e un animador de festa, que tratarán de atraer á xente a esta zona.

Durante todas estas celebracións, as tendas de Lugo permanecerán abertas esperando que esta iniciativa fomente que os clientes compren nos pequenos comercios da cidade.

Outro dos obxectivos, máis que as compras que poidan conseguir ese día, é que os lucenses coñezan estes negocios e poder fidelizar así clientes.