O Sergas confirmou que realizará un cribado a todo o persoal do edificio administrativo da Xunta de Galicia en Lugo, onde traballan ao redor de seiscentas persoas, despois do gromo de covid-19 detectado nas últimas horas nese edificio.
Segundo fontes do Área Sanitaria de Lugo, A Mariña e Monforte de Lemos, de momento foron diagnosticados sete casos positivos de covid-19, logo dun cribado inicial realizado ao ter constancia dun contaxio. A maioría deses traballadores contaxiados forman parte do persoal da Xefatura Territorial da Consellería de Política Social.
Precisamente, para descartar posibles casos asintomáticos e cortar canto antes as cadeas de transmisión, o Sergas programou para este martes, 1 de xuño, outro cribado ao que foi convocado un centenar de persoas, a maioría funcionarios que traballan na planta baixa do edificio administrativo.
Á espera de coñecer os resultados das PCR do cribado realizado este martes no covid-Auto do Hula, o Sergas xa prepara outro, masivo, para que todos os traballadores pasen polas correspondentes probas diagnósticas, co obxectivo final de limitar ao máximo o risco de contaxio nun edificio polo que pasan a diario centos de persoas.