O Sergas descartou este luns que se vaia desmantelar o centro de saúde do Sagrado Corazón e negou que se vaia a trasladar ningunha especialidade ou servizo.
A Xunta saíu ao paso con ese desmentido ao temor que se estendeu este luns entre os veciños unha vez que a asociación Porta de Lugo e os sindicatos CC.OO. e CIG aseguraron que a Consellería de Sanidade pretendía levar a outros centros os servizos de Pediatría, Asistencia Social e Farmacéutico.
A pretensión para o Sagrado Corazón, segundo a Xunta, é construír un novo centro de saúde no barrio, aínda que non é unha opción inmediata porque se requiriría que o Concello cedese terreos.
Un centro de saúde, máis amplo e moderno, segundo a Xunta, é necesario, pero iso non supón que se baralle nin o desmantelamento do centro actual nin o traslado de servizos que se prestan alí. O centro do Sagrado Corazón é dos máis antigos da cidade e ten problemas de accesibilidade, xa que hai barreiras arquitectónicas.
Antes de que a Xunta negase calquera plan de trasladar servizos, tanto Porta de Lugo como CC.OO. deran por feito esa medida "dese tipo nun momento no que é necesario o reforzo dos equipos de atención primaria para facer fronte á pandemia". A CIG aseguraba que se queren facer cambios aproveitando a crise sanitaria do Covid.
Porta de Lugo chegou a anunciar incluso "mobilizacións multitudinarias" para frear un desmantelamento que daban por feito e que, advertía, non estaba disposta a permitir "baixo ningún concepto". Agregaba que hai espazos que poden servir de solución para evitar aglomeracións no centro de saúde nestes momentos nos que hai que extremar as precaucións polo coronavirus.
A Xunta recoñeceu que eses avisos xeraran alarma entre veciños e que houbo colectivos do barrio, como o anpa, que se dirixiron á delegación territorial para preguntar por eses plans de desmantelamento, polo que houbo que tranquilizar aos veciños explicándolles que esas informacións eran falsas, dixeron.
O Sergas detallou que o centro traballa no seu plan interno de volta á normalidade, que require ter espazo para o "dobre circuíto", pero sen retirar servizos.
