Verónica Jiménez comezou no seu novo posto de traballo o pasado luns. É a nova dependenta de Women'secret, no centro comercial As Termas. Ten 24 anos e, ata hai uns meses, debido á falta de estudos, as súas perspectivas laborais eran poucas. "Logo de facer algúns cursos, empecei traballar en limpeza, pero eu tiña ganas de traballar nun sitio no que estivese a gusto".
Decidida a cambiar o rumbo da súa vida laboral, acudiu á Fundación Secretariado Xitano, onde lle deron unha alternativa. No curso "Formatéate con garantías", orientado a menores de 30 en risco de exclusión e sen estudos, aprendeu todo o necesario para traballar no sector téxtil: habilidades comunicativas e motivacionais, formación específica teórica sobre o comercio téxtil e unhas prácticas nunha empresa do sector. Logo de dous meses de clase e un de prácticas, a tenda na que se formou decidiu incluíla no seu persoal.
Jiménez está encantada co recibimento que lle brindou a empresa e co seu novo traballo: "Déronme moita confianza, desde o minuto un", sinala, e engade que iniciativas como o curso do Secretariado Xitano son "moi necesarias, non só para os mozos sen estudos, senón tamén para as persoas da nosa raza. Así nos damos a coñecer coas empresas, para que vexan que non somos como nos pintan".
En Women'secret tamén están encantados con ela. "Verónica adaptouse moi rápido, e ten moitas capacidades para este posto. Está moi implicada e ten moitas ganas, que é o máis importante. é por iso que a contratamos logo de terminar as prácticas", afirma Yolanda Vilas, a encargada da tenda. Nas dúas tendas que a marca ten en Lugo, Verónica é a primeira empregada de raza xitana.