A aceleradora do sector aeroespacial Business Factory Aero (BFAero), con sede en Lugo e impulsada pola Xunta de Galicia no marco das iniciativas vinculadas ao Polo Aeroespacial de Galicia, acaba de seleccionar 28 proxectos, de entre 85 candidaturas, para a fase final da súa terceira convocatoria, na que 7 serán elixidos para ser tutelados e contar con financiamento para o seu desenvolvemento.
Os promotores destas 28 propostas vinculadas ao sector aeroespacial e dos vehículos non tripulados poderán defender os seus proxectos este venres -27 de decembro- e o –luns día 30–, no transcurso dunha entrevista técnica e un 'pitch online' ante o comité executivo de BFAero.
O martes, día 1 decembro, a aceleradora dará a coñecer cales son os sete proxectos que finalmente estarán nesta terceira edición da aceleradora, tres deles en fase de incubación e catro en aceleración.
Galicia é a Comunidade Autónoma que máis proxectos logrou situar nesta fase final, cun total de dez, catro da provincia de Pontevedra, tres da Coruña e tres máis de Lugo.
Os restantes proceden de Madrid, Cataluña, Comunidade Valencia, Castela León, Asturias, Euskadi e Aragón.
Os promotores de BFAero destacan nesta ocasión o elevado "nivel técnico" e a "calidade da maioría das 85 candidaturas empresariais presentadas a esta edición".
En canto ao tipo de programa ao que optan, a metade aspira a entrar na fase de incubación e os catorce restantes á de aceleración.
Con respecto ás áreas temáticas, destacan aqueles que están relacionados con "tecnoloxías habilitadoras" e "co tratamento de datos e información.
Tamén hai un proxecto na fase final relacionado co desenvolvemento de solucións con vehículos non tripulados para loitar contra a covid-19.
