A Policía Local mantén o seu operativo de control da circulación, no que se están levando a cabo comprobacións sobre os vehículos que circulan sen seguro. Dentro deste operativo, o guindastre municipal retirou este mércores un furgón que o seu propietario deixara estacionado en zona de carga e descarga na Ronda da Muralla, tras comprobarse que carecía do seguro obrigatorio.
Segundo parece, o propietario do vehículo industrial presentouse nese momento no lugar e asegurou que si tiña un seguro, precisamente coa aseguradora cuxa oficina esta xusto fronte á zona de carga e descarga, pero os axentes puideron certificar que a póliza non se pagou, polo que o furgón acabou no depósito municipal e non poderá ser retirado ata que se pague o seguro e o guindastre. Foi, en todo caso, só un dos catro vehículos retirados o mércores polo mesmo motivo.
ALCOHOLEMIA. Dentro dos seus dispositivos de control de tráfico, a unidade de atestados estableceu varios controis na cidade na noite do 23 ao 24. Nun deles detectouse un condutor que, logo de facer manobras evasivas para tratar de evitar o control, foi detido e sometido a unha proba de alcoholemia, que deu positiva, polo que o vehículo foi inmobilizado.
Doutra banda, os axentes tamén tiveron que acudir á rúa Hortensia, onde un vehículo articulado que estaba aparcado desprazouse e estaba situado en forma de tixeira, coa cabeza tractora ocupando un carril de circulación e o remolque atravesado na beirarrúa.
A Policía Local procedeu a sinalizar a zona e a localizar o condutor, que achacou o incidente a un posible fallo mecánico e procedeu a estacionar de xeito correcto o vehículo.
Ademais, axentes da Policía Local tamén acudiron durante a noite a unha vivenda de Doutor Gasalla, despois de que o 112 recibise un aviso de urxencia do servizo de teleasistencia da Cruz Vermella, no que se indicaba que unha usuaria podería estar en perigo. Tratábase dunha muller de 93 anos de idade que, en efecto, sufrira un contratempo, pero que se atopaba en bo estado.
