O concurso Lucus Intercentros vai camiño de converterse nun clásico da educación lucense. Foi unha idea da profesora Esther Aldariz, xa xubilada, que se puxo en marcha no IES Muralla Romana para que o alumnado do ciclo superior de Asistencia á Dirección levase á realidade os coñecementos de organización de eventos e actos públicos que adquirían nas aulas e, de paso, crear unha oportunidade de encontro entre todos os institutos públicos da capital a través dos alumnos de primeiro de BAC. A iniciativa cumpriu este venres oito edicións e, nesta ocasión, proclamouse vencedor o equipo do IES Sanxillao, formado por Uxía Castro Cabaco, Afif Chufaovi Mohamed e Daniel Ramos Rodríguez.
No concurso, os sete centros lucenses enfróntanse de dous en dous en mangas de dez preguntas de temática variada. Nos cuartos de final, o IES Ollos Grandes -formado por César López-Testa Pena, Mario Rodríguez Salgado e Janire Trashorras Vázquez- impúxose aos Centuriones da Muralla Romana -integrado por Iván García López, Alejandro Muñoz Seoane e Lucía Vázquez Pimentel-; o Sanxillao, ao IES Lucus Augusti -composto por Pedro Ferreiro Rego, Yanire López López e Andrea Otero Torrón-, e o Ánxel Fole -representado por Jorge Pardo Feijóo, Antía Pérez Vázquez e Carla Varela Fernández-, ao Leiras Pulpeiro -equipo integrado por Laura Chapel Augusto, Andrea González Luaces e Iria Vila Pozo-. Neste último caso, foi necesario desempatar.
Nas semifinais, o Sanxillao gañou ao Xoán Montes, equipo vencedor nas dúas últimas edicións que, por esta razón, ten o privilexio de saltarse os cuartos de final. Este ano estaba representado por Jesús Castro López, Pablo Gallego Arias e Alba Lareo Bóveda. Á súa vez, o Ánxel Fole gañou ao Ollos Grandes e bateuse na última proba co Sanxillao, quedando este vencedor.
[O equipo do Ánxel Fole. S.S.)
O concurso foi presentado polas alumnas Isabel Ferreiro e Lidia Trastoy e na súa organización colaboraron tamén outros centros lucenses, como o CIFP Politécnico, que desenvolveu os pulsadores electrónicos, a Escola de Arte Superior de Deseño Ramón Falcón e a fundación TIC, que difundiu integramente o seu desenvolvemento a través de Facebook. Ademais, tamén contan coa axuda de empresas, un apoio que o equipo organizador agradece enormemente. Trátase do restaurante cafetería Andión, Arisán Multitienda, Chus e José Carnicería, Deseño, Let"s English, Librería MF, MHG, Outlet Becerreá, consulta veterinaria A Piringalla, Prelo, Star Center e Tu Autoescuela.
Na entrega de premios participaron a xefa territorial de Cultura, María José Gómez; a deputada provincial de cultura, Pilar García Porto, e o inspector de Educación Miguel Callón.
