O cribado de dous días organizado polo Sergas na capital lucense comezou este mércores e tan só 580 dos 1.500 mozos citados acudiron á chamada da Xunta, sumando así unha taxa de participación por baixo do 40%.
Este xoves están convocados outros 1.500 lucenses, comprendidos entre os 20 e os 30 anos. Esta franxa é a máis afectada pola quinta onda e na que a vacinación vai máis atrasada.
O persoal sanitario fai un chamado responsabilidade cidadá: "A decepción é alta; nestas campañas invístese tempo, diñeiro e persoal sanitario. é necesario cortar a transmisión do virus e iso conséguese cunha alta participación. Ademais, estamos situados nun punto de fácil acceso para a xente nova", lamenta Juan Pérez Pena, subdirector de enfermería do Hula.
A toma de mostras PCR tivo lugar na facultade de Veterinaria das 16.00 ata as 21.00 horas, o mesmo horario que este xoves. O obxectivo das probas é "detectar casos asintomáticos e aplanar a curva actual", segundo comentou a este diario Pérez Pena.
O encargado do cribado incide no peso do variante Delta na expansión da quinta onda: "A pesar de que a mortalidade é menor, o número de contaxios é moi elevado, un factor que complica as tarefas de rastrexo", explicou este lucense.
Co obxectivo de detectar casos asintomáticos os sanitarios atenden a todo aquel que acuda ao cribado, incluso a aqueles que non conten con cita previa: "Nunca hai un 100% de asistencia, así que se veñen voluntarios dispostos a realizar a proba non lles deixamos escapar", afirma María Condal, enfermeira do equipo covid en Lugo.
Ademais de PCR, os sanitarios tamén dispoñen de probas de antíxenos, para aqueles lucenses que presenten síntomas.
BAIXA ACEPTACIÓN. Durante os últimos días realizáronse varios cribados na área sanitaria de Lugo. A tónica xeral é "preocupante" posto que só nun, no de Cervo (63%), excedeuse o 50% de participación. Nalgún da Mariña rexistrouse unha marca inferior ao 45%, cifras que chocan coa petición que fixo o Sergas á cidadanía para acudir de forma "masiva" á citación. Esta actitude podería deberse, entre outros factores, á irresponsabilidade individual.
O cribado da capital chega despois de que o martes comezásese a aplicar a pauta de vacinación aos menores de 30 anos en Lugo.
