Axentes da Policía Local de Lugo realizaron varios controis durante o fin de semana en establecementos de lecer da capital e tramitaron tres propostas de sanción, concretamente en senllos establecementos das rúas Salvador de Madariaga, Luís Seoane e Camiño Real.
No primeiro, os axentes levantaron acta por realizar a súa actividade coas portas abertas, transmitindo "altos niveis de ruído ao exterior". Este local tamén foi proposto para sanción por permitir aos clientes sacar as consumicións á vía pública, "fóra dos espazos autorizados" para iso.
No local de Luís Seoane, os policías detectaron que se excedía o horario de peche, o que provocaba molestias á veciñanza, mentres que no pub de Camiño Real, instalara un reprodutor musical a pesar de que o propietario non tiña autorización administrativa para utilizalo.
Así mesmo, tal e como confirmou este luns o portavoz policial, nun dos establecementos levantouse acta contra o propietario por infracción á Lei Orgánica de Protección da Seguridade Cidadá, "por falta de respecto e consideración aos axentes que inspeccionaban o local".
A Policía Local realiza a miúdo estas inspeccións en locais de lecer nocturno para comprobar se se axustan á normativa local e autonómica sobre espectáculos públicos e actividades recreativas. Nalgunhas zonas da cidade, as queixas dos veciños polos ruídos nocturnos que xeran os locais de lecer son constantes, polo que a Policía intensificou o control.