Axentes da Policía Local de Lugo denunciaron a cinco persoas que estaban a compartir cachimbas para fumar nun local da Rúa Catedral, no centro histórico da cidade, por infrinxir a Lei de Saúde de Galicia, que inclúe as medidas para loitar contra a pandemia e frear a propagación do covid-19.
Segundo informou a propia Policía Local, axentes da Unidade Territorial de Policía de Barrio realizaron unha inspección no citado local, este xoves sobre as 20.30 horas, onde tramitaron oito denuncias.
Ademais das cinco persoas sancionadas por compartir cachimbas, o propietario foi denunciado por non presentar "o título habilitante do establecemento" e por ter en funcionamento un equipo para reproducir música sen autorización para iso.
Tamén foi denunciado o propietario por superar o aforamento máximo permitido, dado que o local ten capacidade para 33 persoas e había 26 no seu interior, cando o aforamento dos establecementos de hostalería está limitado ao 50% polas autoridades sanitarias.
