O milagre de San Vicente volveu producirse en Lugo. Da fonte da Praza do Campo manaron este luns uns 300 litros de viño mencía por sexto ano consecutivo. Xa que, aínda que esta tradición remóntase aos anos setenta do século pasado, foi oficialmente recuperada no 2014.
Entre os centos de asistentes estiveron tamén a alcaldesa, Lara Méndez, e a concelleira de turismo, Maite Ferreiro. A alcaldesa foi unha das encargadas de repartir o viño entre os asistentes e desde a asociación Lugo Monumental aseguran que "xa é unha máis dentro da organización desta festa, xa que vén todos os anos".
Esta iniciativa conta co apoio da asociación de empresarios Lugo Monumental; o patrocinio de Vilinga, viños e licores galegos, e a colaboración do Concello.
Momentos antes do inicio da festa, a asociación Lugo Monumental mostrábase un pouco preocupada e cautelosa en canto á asistencia, xa que crían que celebrar esta xornada un luns podía prexudicalo.
Con todo, centos de lucenses achegáronse para poder ver cos seus propios ollos o milagre de San Vicente e probar o viño, que se distribuíu de forma gratuíta. Luis Latorre, presidente da asociación Lugo Monumental, cre que "cada vez máis lucenses coñecen esta celebración", pero que segue habendo xente que cada ano se sorprende, especialmente, os turistas, xa que é algo moi vistoso e orixinal". A velada estivo amenizada pola asociación cultural Cantigas e Frores, que tocaron música popular galega.