A alcaldesa de Lugo, Lara Méndez, confirmou que, á espera de ver como vai evolucionando a pandemia, a intención do goberno local é manter a celebración das patronais de San Froilán –festas declaradas de Interese Turístico Nacional–, que comezarán a principios de outubro.
"Estamos á espera de ver como vai evolucionando a pandemia. Está previsto realizar concertos acoutados, reducidos de aforamento, para que se poidan facer en todos os lugares e prazas da cidade", explicou a alcaldesa a Efe.
Precisou, en calquera caso, que se fala dun San Froilán distinto, nos barrios, para que todo o mundo poida manter ese espírito e conmemorar o noso patrón, pero sempre de forma segura".
En todo caso, tamén aclarou que a celebración se mantén, pero sempre á espera de ver "como evoluciona a pandemia", tamén "para ver se se pode manter o que está previsto agora mesmo ou hai que modificalo e adaptalo ás novas circunstancias".
Pola súa banda, o grupo municipal do Partido Popular pediulle este mércores ao goberno local de Lugo que, se finalmente a evolución da pandemia obriga a suspender os actos previstos para celebrar as patronais de San Froilán, ese diñeiro vaia destinado a axudas para autónomos e empresas afectadas polas restricións para frear o Covid-19.
De feito, o portavoz municipal do PP, Ramón Carballo, dixo que "ademais do diñeiro que se aforre das patronais", o fondo desa liña de axudas podería nutrirse "coas achegas que non se gastaron das festas parroquiais anuladas este verán ou co que quedou no peto da previsión de gasto do Arde Lucus".
Ademais, a "base do capital dese programa podería fortalecerse cos remanentes municipais que agora si se poderán utilizar", engadiu, "tras o fracaso do Goberno" na súa intención de "expropiar" ese diñeiro aos concellos, que no caso de Lugo "suman 18 millóns de euros".
"O goberno local ten a oportunidade de demostrar que está á altura", dixo Carballo, e pídelle que "cre unha partida duns 2 millóns de euros para reducir o impacto que están a ter ou que terán en negocios e industrias do municipio, as corentenas derivadas do Covid-19".
