O xulgado do Penal número 2 de Lugo impuxo unha condena de seis meses de prisión a un home que se saltou a orde de afastamento da súa parella, con consentimento da moza. O xuíz denegoulle ademais a suspensión de condena porque xa era a terceira vez que lla saltaba, polo que terá que cumprir a pena nun centro penal.
Segundo explica a sentenza, o 4 de agosto de 2016, o xulgado de Instrución número 3 de Lugo impúxolle ao acusado unha medida cautelar que lle prohibía achegarse á súa compañeira sentimental ou comunicarse con ela por calquera medio, "sendo debidamente notificado e advertido das consecuencias en caso de quebranto".
A pesar diso, o 12 de decembro de 2016, sobre as dúas e media do mediodía –cando a orde xudicial estaba en vigor–, unha patrulla da Policía Nacional sorprendeu á parella paseando xunta pola rúa Camiño Real.
O home foi acusado dun delito de quebrantamento de condena e o xulgado do Penal número 2 de Lugo condenouno a seis meses de prisión e negoulle a suspensión da pena. O home presentou un recurso ante a Audiencia Provincial de Lugo, pero o tribunal comparte por completo o criterio do xuíz e considera que o acusado ten que ingresar en prisión.
"Ademais de ter outros antecedentes penais", explica, "cónstanlle dous quebrantamentos de condena máis, un pendente de cumprimento e outro coa pena suspendida. Non pode restarse importancia a tales sentenzas, pois polo menos por mor da primeira detención tería que coñecer o alcance da súa conduta, e a pesar diso persistiu no achegamento á súa parella a pesar de coñecer as consecuencias que levaba. Iso evidencia pouco respecto ás decisións xudiciais e un escaso efecto de prevención".
