As novas salas de cine da rúa Montero Ríos abrirán nunha semana. Xildar Fuxaos SL, a firma que adquiriu a finais de marzo os locais de proxección, xa ten ultimada a reforma e prevé iniciar a actividade o vindeiro venres. Ese día haberá xa proxeccións en horario comercial, polo que as salas funcionarán con total normalidade, segundo a previsión.
A empresa, que recupera a oferta da sétima arte para o centro da cidade, vai proxectar nas salas de Montero Ríos tanto cine comercial como de autor.
Este multicine, que levaba máis dunha década pechado, foi obxecto dunha intensa remodelación e terá unha capacidade media para uns 120 espectadores en cada sala. Perdeuse algo de espazo en cada unha das tres debido a que se instalaron butacas máis amplas e cómodas, en sintonía coa demanda actual do público.
Os cines de Montero Ríos reabren da man de Xildar Fuxaos SL, unha sociedade recentemente constituída que, por coincidir varios dos socios, ten relación con Ciproga, a compañía galega que nestes momentos explota os cines do centro comercial Abella e que ata finais do ano pasado xestionaba tamén os das Termas.
A reapertura das que serán as salas máis céntricas da cidade prodúcese nun momento de cambios no sector, tras a recuperación hai uns meses dalgunhas das antigas salas da Praza Viana do Castelo, onde se proxecta cine que non leva a etiqueta de comercial, e a reforma nas Termas, onde operará Yelmo, unha das grandes firmas nacionais de distribución.
A reapertura nas Termas atrasouse segundo o inicialmente anunciado pero cando se reinicie a actividade haberá en Lugo catro operadores de cine funionando, sempre que Ciproga opte por continuar en Abella.
