O Sagrado Corazón é desde este venres un pouco máis accesible. O Concello puxo en funcionamento o ascensor que conecta o núcleo do barrio coa rúa Adolfo Suárez e fixo realidade así un proxecto que arrastrou tantos gafes que chegou a demorarse lustros.
É o terceiro elevador urbano da cidade, tras o que dá acceso á muralla e o de Fontiñas, e facilitará o acceso a un dos barrios menos accesibles de Lugo e cuxa realidade está condicionada polo envellecemento de moitos dos seus veciños, gran parte dos cales chegaron alí cando se construíu ese polígono, impulsado hai aproximadamente medio século pola entón Caixa de Aforros da Coruña e Lugo.
A construción do elevador do Sagrado Corazón adxudicouse finalmente o ano pasado, cun orzamento inicial de 240.000 euros, á firma ourensá Alea. A previsión inicial era que o ascensor puidese empezar a funcionar tras o verán, pero as obras retardáronse e o Concello chegou a ameazar con sancións á construtora, para que volvese imprimir ritmo ás obras.
E é que o servizo de ascensor era moi demandado polos veciños, pero ademais o proceso de construción, e a demora, non deixou de provocar molestias. Para empezar, porque as obras obrigaron a demoler a escalinata que comunicaba o barrio con Adolfo Suárez e que supuñan o acceso máis rápido para chegar ao barrio desde o centro da cidade.
O atraso da obra afectou os veciños do polígono e aos usuarios dos servizos que hai nesta zona -máis elevada que a Avenida de Adolfo Suárez- como son
Desde este venres, para os veciños todos eses problemas serán xa pasado. Estrearán un servizo que se anunciou hai lustros e que sufriu moitos cambios ao longo dos anos. Por exemplo, inicialmente previuse que houbese dous elevadores. Logo, a obtención do terreo para instalalo converteuse noutro obstáculo.
