Preto de medio centenar de establecementos de hostalería da provincia participarán na nova campaña de Exaltacións Gastronómicas, que se prolongarán ata o día 29 para promocionar produtos como o porco celta, os grelos, a pataca e o mel. O reto da campaña de exaltacións é seguir promocionando o turismo gastronómico.
O vicepresidente da Asociación de Empresarios de Hostalería (Apehl), José Manuel Cela, e a deputada de turismo, Pilar García Porto, presentaron a nova campaña, nun acto xunto a representantes de Asoporcel, Afapán e as indicacións xeográficas protexidas Grelos de Galicia, Pataca de Galicia e Mel de Galicia.
A iniciativa, coa que cada mes ata novembro teñen lugar unhas xornadas gastronómicas, ten o apoio de entidades como Afapan, o Consello Regulador de Augardentes e Licores Tradicionais de Galicia, a DOP Queixo Tetilla, a IXP Mel de Galicia, Avimós, a IXP Castaña de Galicia, a IXP Ternera Gallega, o CRDOP Queixo do Cebreiro, Asoporcel, a DOP San Simón da Costa, Galletas Daveiga, o CRDO Ribeira Sacra, Armadores de Burela SA, a IXP Faba de Lourenzá, Acruga, a DOP Arzúa-Ulloa, Asovega, a IXP Lacón Gallego, a IXP Pementos de Mougán, a IXP Grelos de Galicia e a IXP Pataca de Galicia.
