Aínda que a Organización Mundial da Saúde recomenda a lactación materna exclusiva ata os seis meses, son moitas as mulleres que renuncian total ou parcialmente a ela moito antes e, en ocasións, por atoparse cun ambiente non propicio. Para promovela e apoiala creouse no Hula unha Comisión de Lactación que aspira a mellorar as actuais taxas, xa que só o 38,5% das mulleres que dan a luz no hospital lucense mantéñena en exclusiva ao recibir o alta tras o parto.
O curso tivo unha gran resposta, xa que logrou reunir 300 profesionais do Sergas próximos ás mulleres gestantes. Cristina Ouro, matrona e membro da comisión organizadora, explica que ese era precisamente o obxectivo, que acudisen traballadores de todas as categorías que rodean a unha nai. Así, formáronse ademais de matronas, enfermeiras, pediatras, xinecólogos, médicos de Familia, de Urxencias, de Urxencias pediátricas, de Anestesia, celadores e persoal de limpeza.
Ouro destaca a importancia dunha contorna proclive á lactación. "É importante que todos os traballadores que están preto dunha nai teñan un coñecemento básico de lactación", di, á vez que recorda que, nos primeiros momentos, as nais poden apreciar un consello ou unha mensaxe de ánimo e perseverar na intención de aleitar os seus fillos.
O taller práctico impartido reuniu médicos de varios servizos, matronas, enfermeiras, celadoras e persoal de limpeza
Por outra banda, un curso como o deste xoves, que promove e apoia a lactación materna, serve tamén para que os profesionais cos que se atopa a nai durante o seu ingreso hospitalario, en Primaria ou na súa asistencia a consultas acheguen a mesma mensaxe. "Moitas veces, as nais recrimínannos que un lle aconsellou unha cousa e outro, o contrario e que non saben que facer", explica a matrona.
O curso contou inicialmente cunha parte online, que ofreceu a teoría da lactación, mentres que a xornada deste xoves centrouse na parte práctica. Divididos en grupos reducidos, os asistentes traballaron con pediatras e matronas expertas acreditadas en lactación materna para axudar as nais a iniciarse na lactación e promover o seu mantemento.
Con estas medidas e outras actividades que promoverá a Comisión de Lactación do Hula aspírase a mellorar as estatísticas, que ademais de revelar que menos do 40% de mulleres elixen a materna en exclusiva tras a alta, indican que un 45% recorre á mixta. Na actualidade, só o 16% opta tras saír do hospital pola artificial en exclusiva.
