O tenente de alcalde, Rubén Arroxo, xunto co edil de infraestruturas, Alexandre Penas, e persoal técnico municipal mantiveron unha reunión este sábado con representantes de usuarios de coches eléctricos para coñecer as necesidades do colectivo.
Arroxo explicou que desde o goberno local están a avanzar de face a unha cidade moito menos contaminante e máis respectuosa co medio ambiente, e os vehículos de baixas emisións son un dos alicerces máis importantes para conseguir este obxectivo.
O tenente de alcalde afirmou que desde a área de mobilidade seguen traballando para fomentar o transporte público e o uso da bicicleta para os desprazamentos na cidade. Este feito, segundo Arroxo, favorecerá que os veciños de Lugo utilicen o vehículo particular o menos posible para reducir a contaminación.
TRANSPORTE PÚBLICO. Para o edil nacionalista a entrada en funcionamento das novas liñas de transporte público na cidade permitirán reducir os desprazamentos en vehículo particular, xa que os usuarios deste servizo público contarán con mellores frecuencias e conectaranse máis zonas da cidade.
Rubén Arroxo tamén destacou durante a reunión con propietarios de vehículos eléctricos, os últimos datos de circulación recollidos na Rolda dá Muralla.
Estas cifran arroxan unha diminución da circulación en 30.000 vehículos por mes con respecto ao mesmo período do ano 2019.
O tenente de alcalde manifestou durante o acto que este feito permitiu o aforro dunha emisión dunhas 20 toneladas de CO2 á atmosfera, e afirmou que o Concello traballa para que a veciñanza de Lugo conte, nun futuro próximo coa infraestrutura necesaria para que apostar por vehículos de baixas emisións sexa posible.
