A Ronda da Muralla xa non é a opción máis rápida para atravesar a cidade, sobre todo desde que o Concello habilitou un dos carriis desta vía para que puidese ser usado polos peóns. Ademais, a intención do goberno local é seguir avanzando na redución do tráfico rodado por esta rúa de modo que xa empeza a deseñar trazados alternativos para persuadir aos condutores e que utilicen outras rutas para cruzar a cidade.
Así, o tenente de alcalde e responsable da área de mobilidade, Rubén Arroxo, anunciou este luns que nos próximos días sinalizará unha ruta alternativa para os vehículos entre a porta de San Pedro e o parque da Milagrosa, que evita o paso pola Ronda da Muralla e o primeiro tramo da Avenida da Coruña e que, segundo asegura, aforra tempo e pode realizarse en só 5 minutos, fronte aos 7 que pode supor polo trazado máis recto.
"Os estudos de tráfico realizados mostran que o tramo entre San Pedro e a Avenida da Coruña son os que sofren máis retencións nas horas puntas", asegura Arroxo, quen expón como vía alternativa para unir o barrio de San Roque coa zona norte o paso polo Sagrado Corazón e Paradai.
A nova ruta que será sinalizada expón baixar desde Ronda en San Pedro pola rúa Montero Ríos para cruzar a vía do tren pola ponte da estación e continuar por Serra de Meira, volvendo cruzar o trazado ferroviario pola nova ponte de Paradai. Logo se seguiría por Infanta Elena para subir por Alexandre Bóveda e Río Narla ata o parque da Milagrosa ou continuar por esta avenida e por Ronda Norte para ir cara aos barrios da Piringalla ou Garabolos. "Estes percorridos contan con vías amplas e só dous cruces regulados por semáforo, o que permite reducir ata nun 50% o tempo empregado en realizar este percorrido", sinala o tenente de alcalde.
Segundo Rubén Arroxo, "seguindo esta ruta alternativa requírense entre 5 e 10 minutos para chegar ao destino, mentres que nos momentos de máximo tráfico na Ronda da Muralla, pode chegar a levar máis de 15". O edil nacionalista asegura que nos próximos días colocaranse sinais para informar desta ruta alternativa para así continuar avanzando na redución do tráfico rodado na Ronda da Muralla, evitando vibracións que afecten á muralla e facilitando unha circulación máis fluída de vehículos de residentes, de repartición ou transporte público.
