O reitor da Universidade de Santiago de Compostela, Antonio López, confirmou que o número de alumnos matriculados por primeira vez no Campus de Lugo aumentou en relación co curso pasado, debido, entre outros factores, á implantación da nova titulación de strong <>Robótica, que tivo unha gran demanda.
“Sen caer en autocompracencia, porque hai que seguir traballando, a cousa vai ben. Aumentamos os alumnos de primeira matrícula no Campus de Lugo. Temos ao redor de strong <>setenta alumnos máis matriculados por primeira vez que tivemos o curso pasado”, afirmou.
Ese incremento na matrícula “ten moito que ver coa implantación da nova titulación de Robótica, que tivo moi boa aceptación por parte do estudiantado”.
“Nesa liña temos que seguir. Non nos conformamos. Estamos inmersos na redefinición da oferta educativa no Campus de Lugo e, de face ao ano que vén, estamos a traballar en novos plans de estudo para a implantación de Bioquímica, Administración e Empresa ou Xestión Cultural”, engadiu.
O obxectivo non é outro, aclarou, que “reforzar a oferta docente do campus de Lugo e conseguir máis estudantes”.
O reitor tamén destacou que a universidade está “a utilizar todos os mecanismos que lle achega a Administración”, pero a pesar da colaboración da Deputación e o Concello “son medidas ás que hai que darlles tempo”, porque non teñen unha eficacia inmediata. “Niso estamos”, concluíu.
Antonio López fixo estas declaracións a Efe antes de participar no acto de benvida aos alumnos que se matriculan por primeira vez no campus lucense, que tivo lugar no auditorio da Facultade de Veterinaria.
Tamén asistiron a vicerreitora de Coordinación do Campus de Lugo, Montserrat Valcárcel; o delegado territorial da Xunta de Galicia, José Manuel Balseiro; ou o presidente da Deputación, José Tomei, entre outras autoridades.
