Axentes da Policía Nacional rexistraron ao longo da mañá deste martes polo menos catro domicilios da capital lucense e detiveron a cinco persoas no marco dun operativo especial contra o tráfico de drogas, dirixido polo xulgado de Instrución número 3 de Lugo.
Na redada, levada a cabo polo grupo de Policía Xudicial da comisaría lucense, colaboraron tamén as Unidades de Prevención e Reacción (UPR), desprazadas desde A Coruña, un grupo que participa en dispositivos especiais contra a delincuencia e que apoia a outros axentes nas intervencións relevantes.
Os investigadores solicitaron ademais a participación dos guías caninos, que están especializados na detección de drogas, diñeiro de curso legal ou explosivos, entre outros labores. Os cans da Policía Nacional inspeccionaron varios domicilios en busca de sustancias estupefacientes, así como as leiras próximas ás vivendas frecuentadas polos detidos.
As forzas e corpos de seguridade non facilitaron este martes información oficial sobre os resultados obtidos nos rexistros –xa que a operación atópase baixo segredo de sumario–, aínda que fontes coñecedoras do caso sinalaron que non se incautaron cantidades importantes de droga nin tampouco de diñeiro procedente do tráfico de estupefacientes. Os cinco detidos son catro homes, que onte á noite seguían na comisaría á espera de pasar a disposición xudicial, e unha muller, que foi posta en liberdade pendente de ser citada polo xulgado.
ZONAS. Os rexistros domiciliarios comezaron ao redor das oito da mañá no número 53 da Calzada da Ponte, unha vivenda de dúas plantas na que supostamente residen varios okupas. Segundo explicaron algúns veciños, estas persoas instaláronse na vivenda hai aproximadamente dous meses e non chegaron a ocasionar molestias nin conflitos, senón todo o contrario, xa que "pasaban bastante desapercibidas", comentaron. De feito, os veciños cren que nin tan sequera vivían na casa de forma continuada, senón que poderían utilizala "para esconder a droga".
Os axentes realizaron tamén outros dous rexistros nunha vivenda de Lamas de Prado e noutra na Rúa Milagrosa, que foron precintadas. Ademais, inspeccionaron minuciosamente un domicilio da zona das Gándaras, onde os guías caninos percorreron tamén durante varias horas as leiras próximas ao inmoble. Os cans adestrados acompañaron aos axentes do grupo de Policía Xudicial de Lugo por varios solares próximos ao polígono industrial, ateigados de maleza, onde sospeitaban que a organización podería esconder drogas, diñeiro ou incluso outros obxectos implicados en feitos delituosos.
O despregamento policial levado a cabo na capital lucense foi o colofón a un intenso traballo de investigación, xa que os axentes levaban meses seguindo os pasos dos sospeitosos. Aínda así, as pescudas continúan abertas e non se descartan novas intervencións policiais ao longo dos próximos días.
O operativo deste martes é o segundo destas características levado a cabo na capital lucense no que vai de ano, despois de que unha redada o pasado mes de marzo no poboado chabolista de Mazoi.
