Levar o peto de can de asistencia costa o seu. Mínimo, nove meses de adestramento onde o animal –á parte de aprender a obedecer as ordes máis básicas de sentar , tombarse ou levantarse– ha de saber, sobre todo, como reaccionar no caso de que se solten as ancoraxes do peto que o unirá ao que será, a partir de nadal, o seu dono e compañeiro inseparable, Daniel Vázquez, un neno de 8 anos que sofre autismo.
Tiramisú é un can de raza labrador que chegou ONG DogPoint con só sete meses. Antes, pasou por dúas familias que lle ensinaron as nocións máis básicas de socialización e obediencia chegando, incluso, a asistir diariamente a clase na universidade onde estaba matriculada unha das fillas da parella que o acollía.
"O can xa chegou a nós socializado. Aos tres ou catro meses, estaba a subir ramplas no aeroporto de Barajas. Por iso, non se asusta nin polas luces, nin polos ruídos, nin polos cheiros, nin pola presenza de xente", explica Cristina Novillo, a traballadora social de DogPoint.
Tiramisú foi cedido ONG que o educa como can de asistencia pola última familia colaboradora. Noutros casos, os animais son adquiridos a criadores pola asociación. Unha vez sometido a distintas probas médicas para comprobar o seu estado de saúde, o animal comeza un ciclo de adestramentos cun único fin: converterse nun can de asistencia para un neno cun trastorno de espectro autista.
"Agora mesmo, temos unha lista de espera de dez familias de toda España, que desexan levar a casa un can destas características. Este ano imos adestrar a dez canes. O importante é socializalo, que o can poida ir no metro ou ao cine sen pasalo mal e que tampouco se asuste cando pise chans brillantes ou ao ver a alguén con gorro ou máscara", conta Cristina Novillo, de DogPoint.
A solicitude da familia é o primeiro paso de todo este proceso no que se busca, sobre todo, que o animal achegue tranquilidade e seguridade ao neno e aos seus pais. "Non somos expendedores de cans de asistencia. Somos unha tribo na que as familias que xa teñen can apoian ás outras", afirma Cristina Novillo.
CASETA. Ao longo da mañá, desde as dez ata as dúas, haberá unha caseta na rampla de acceso á muralla na Porta de Santiago, onde se recadará diñeiro para esta campaña. Dáse a circunstancia de que Tiramisú será o primeiro can que DogPoint entregará a unha familia con neno autista en Galicia.
