A restauración do Buen Jesús de Lugo deixará á vista lenzos con escenas bíblicas

A restauración do retablo do Buen Jesús da catedral de Lugo deixará á vista as escenas que decoran os dous lenzos laterais, unha de María Magdalena e outra de San Pedro, que ata agora permanecían completamente tapadas por mor da graxa das candeas. Ademais, mostrará toda a policromía orixinal, como foi concibido no seu momento, cuns tons moito máis claros e luminosos.

A restauradora Vania López Arias comezou a traballar nesa obra a pasada primavera. Inicialmente, estaban previstas só tarefas de limpeza polo que se prevía que non se prolongase demasiado. Con todo, decatouse enseguida de que, baixo capas de pintura escura, atopábase a policromía orixinal, co que recuperala converteuse no obxectivo e quedou claro que o traballo ía ser máis laborioso.

Os estadas foron retirados no verán porque había programadas varias vodas na catedral, así como a Ofrenda do Antigo Reino de Galicia e volvéronse a colocar agora para proseguir coa recuperación.

López Arias prevé que non acabe ata pasados outros dous meses, momento no que se poderá observar como foi en realidade concibido este retablo neoclásico.

O retablo é obra de Francisco Javier Meana, autor tamén das tallas de San José e Santa Lucía que están na catedral

Ademais de observar con claridade as dúas escenas dos lenzos, quen visiten a catedral decataranse de que, tras a restauración, a obra ao completo é moito máis clara. "Terá máis luz porque ata agora estaba moi escuro", apunta López Arias, que recorda que é do mesmo autor que os retablos de Santa Lucía e de San José, e que a pintura imita a superficie do mármore, neste caso cunha veta lila.

Como no seu momento non se puido limpar a policromía orixinal pintouse por enriba. O traballo da restauradora consiste agora en eliminar ese repinte e mostrar a primeira capa da obra. Tamén se dá a circunstancia de que nalgunhas zonas da parte frontal intentouse lixar, mentres que na parte traseira (as zonas máis ocultas) pintouse directamente, o que converte todo o labor de recuperación en máis complexo aínda.

A talla é Francisco Javier Meana, un recoñecido escultor da escola de San Fernando que ten bastante obra en Lugo. Non só ese retablo e os de Santa Lucía e San José son seus, senón que tamén o é a imaxe principal da capela de San Roque.

López Arias foi tamén a restauradora que deu nova vida á talla de San José, igualmente de madeira imitando a mármore.