Axentes da Policía Local de Lugo rescataron nas últimas horas un cachorro —un cruzamento de mastín— ao que supostamente os seus donos deixaron tirado nun edificio abandonado da cidade. Foron veciños da rúa Isaac Díaz Pardo os que alertaron á Policía Local de que escoitaban xemer no interior dun edificio abandonado, nesa mesma vía, un can.
Cando os axentes accederon ao interior do inmoble atopáronse o cachorro sen comida e sen auga. Tampouco levaba o correspondente microchip nin ningún outro tipo de identificación, polo que foi trasladado á protectora pola Policía Local.
