A resolución ditada polo Tribunal Superior de Xustiza de Galicia feita pública este xoves que obriga a repetir a votación dunha mesa electoral no concello de Burela deixa no aire, polo momento, a constitución da Deputación. Estaba prevista entre o 10 e o 15 de xullo, xa con atraso debido aos dous recursos contenciosos electorais interpostos en Burela e en Monterroso, pero a decisión de repetir eleccións na localidade mariñá podería atrasala aínda máis.
Aínda que tras a reforma da lei electoral, no 2011, establécese que, no caso de que deban convocarse novas eleccións como consecuencia da resolución dun recurso electoral, estas non impedirían a constitución da Deputación, a xuíza da xunta electoral de Mondoñedo ten dúbidas acerca da vulneración dos dereitos de participación dos concelleiros burelenses.
E é que ao non ser definitivos os resultados de Burela, os edís elixidos o 26-M non poderían votar aos deputados do seu partido xudicial de cara á constitución da Deputación, nin tampouco poderían eles mesmos presentarse como deputados ou suplentes. Esta situación é nova para a xunta electoral de Mondoñedo e tamén para a provincia Lugo baixo a lei electoral en vigor, polo que a xuíza de zona consultará o caso á xunta electoral central, que resolvería a dúbida no prazo dunha semana, segundo fontes da Deputación.
O ente provincial confirmou este xoves estar supeditado á decisión que tome a xunta electoral de Mondoñedo, pero advertiu tamén da posible vulneración dos dereitos dos concelleiros burelenses. Pola súa banda, o Ministerio do Interior terá un prazo de ata tres meses para convocar esta nova chamada ás urnas en Burela.
As eleccións non alterarían a atribución de deputados, debido ao número limitado de electores da mesa onde se teñen que repetir
O que non poría en cuestión a repetición das eleccións nesta mesa, debido ao limitado número de electores adscritos á mesma, sería a asignación dos deputados por partido (tres para o PP, dous para o PSOE e un para o BNG). Aínda así, a lei contempla o suposto de que, como consecuencia das eleccións, se alterase a atribución de postos na Deputación, e nese caso establece que a xunta de zona debería realizar as operacións necesarias para unha nova asignación.
ANTECEDENTES. A constitución da Deputación de Lugo sufriu un atraso de nove meses tras as municipais do 1987, por irregularidades no voto por correo no Valadouro, que obrigaron a repetir as eleccións alí, e en Muras, onde a desaparición dun voto tamén obrigou a repetir os comicios. En Monforte ocorreu o mesmo en 1999. A reforma da lei electoral introducida en 2011 tivo entre os seus obxectivos impedir ese tipo de atrasos.