O vindeiro luns abrirá as súas portas a casa de maiores Penarrubia, sita na parroquia de Orbazai, a uns seis quilómetros da capital lucense. Ofrece 12 prazas para persoas que se poden valer por si mesmas ou que teñen unha dependencia leve.
Lugo é un municipio con déficit de prazas para persoas maiores. Hai unha por cada 23 habitantes que ten 65 anos ou máis. Son ao redor de 900 -un terzo públicas- para os 20.584 lucenses que superan esa idade.
Este centro xeriátrico é unha iniciativa das irmás Núñez Pérez. Mercedes é terapeuta manual, Eva enfermeira especializada en xeriatría e Ángeles educadora social. Completa o persoal o fillo desta última, Jesús, que se encarga da cociña. Elaborará, segundo aseguran, pratos "con produtos frescos, ecolóxicos e de tempada".
Eva Núñez di que se pretende xerar un ambiente que sexa o máis hogareño posible para os usuarios, con espazos "comúns amplos e abertos". Así, o comedor ten unha gran mesa para compartir.
Ademais do servizo que presta, tan demandado nunha sociedade cada vez máis envellecida, chama a atención o coidado proxecto arquitectónico. O seu autor, José Angel Carreira Montes, explica que é "como unha casa refuxio non bosque".
A MEDIDA. O inmoble, duns 500 metros cadrados de superficie situado nunha parcela de 6.500, está feito en madeira sostible, a medida, non prefabricado. Empregáronse unhas 100 toneladas de piñeiro norte, procedentes de Finlandia, no seu armazón, cuberta, pavimento, vigas ou muros de carga.
O arquitecto apunta que a pretensión é que se integrase na contorna, tanto cromáticamente, con cores ocre, verde e amarelo nas súas fachadas, como cos materiais usados, madeira e lousa.
A lámpada que preside a entrada, que asemella tres follas de árbore, é obra do artesán Bieito Miranda, que utilizou para fabricala restos de vigas e rastreis de madeira.
No interior da casa priman os tons claros para dar sensación de luminosidade. A planta ten forma de cruz e o alto teito busca xerar, salvando as distancias, "un ambiente catedralicio", segundo precisa Carrera Montes. Ao fondo hai unha galería que os usuarios poden utilizar como "parladoiro". As fiestras son máis baixas do habitual para que as persoas maiores poidan contemplar a contorna natural se están sentados.
Esta casa de maiores celebrou este mércores a súa posta de longo, nun acto ao que asistiron a alcaldesa Lara Méndez e os edís Miguel Fernández e Ana González Abelleira.
