A obra está avanzada e o espazo urbano que gañará Lugo coa reforma da A Mosqueira xa se albisca claramente. Pero aínda queda traballo por diante. Entre outras cousas, porque a actuación vaise a estender cara á Praza Mártires de Carral, aínda que non abarcará a totalidade desa praza, senón o tramo máis próximo á Mosqueira desde o cruzamento coa rúa Río Neira.
O tenente de alcalde, Rubén Arroxo, explicou que se decidiu ampliar a intervención porque é un espazo moi vinculado á Mosqueira e non tiña sentido deixar ese tramo tal e como está agora, cando pode gañar protagonismo como espazo peonil.
O inicio da intervención nese tramo de Mártires de Carral arrincará en cuestión de días, en canto acabe a obra que se está facendo agora para conectar a obra da Mosqueira coa Praza da Constitución e o tramo da Ronda que se peonalizou anos atrás. A obra nese tramo é tamén unha ampliación sobre o proxecto inicial.
Máis aló desas ampliacións do proxecto, o perfil da nova Mosqueira xa está completamente definido, aínda que están pendentes aspectos como plantación de parte das árbores ou o axardinamento das novas zonas verdes.
Aínda que sen luces aínda, si están instaladas as novas luminarias. Trátase dunha iluminación con protagonismo propio, apunta Arroxo, xa que vai cambiar a forma de ver a muralla de noite.O proxecto na Mosqueira supuxo a retirada dos focos que proxectaban luz ornamental sobre o monumento. O cambio obedece en parte ás recomendacións de Patrimonio, que consideraba que as luces no chan creaban unha distorsión da imaxe da muralla.
Cos novos focos ese impacto negativo da luz non se dará, di Arroxo, que engade que ademais agora se evitará a contaminación lumínica, outro tipo de efecto negativo que as novas normativas instan a corrixir.O proxecto para a transformación dese icónico espazo da muralla supuxo un investimento de 600.000 euros. A obra está a pagarse con fondos municipais, que poderían chegar a recuperarse se, tras entrar na lista de reserva, acabasen quedando dispoñibles fondos europeos que non se gasten noutras cidades.Rubén Arroxo: "Confiamos en acabar en abril. Houbo atrasos pola falta de man de obra e o problema do subministro de materiais"
Sería unha oportunidade, porque permitiría rescatar fondos municipais para outros proxectos, di Arroxo, que cre que, en todo caso, o investimento está a valer a pena porque se vai a xerar unha gran praza que, está seguro, colocarase entre as máis usadas de Lugo.
Na tenencia de alcaldía traballan agora coa perspectiva de que a obra poida estar acabada en abril. Houbo atraso nos prazos porque se sumaron complicacións como o atraso na subministración de materiais e incluso a falta de man de obra.A empresa construtora tivo que buscar traballadores fóra, incluso a Senegal, porque hai moitas obras en marcha nestes momentos e non hai traballadores.
O atraso nas subministracións foi outro obstáculo serio e afectou incluso a materiais de orixe galega. A razón, apunta Arroxo, é que a demanda de materiais é moi forte nestes momentos e as empresas non dan abasto para satisfacela. Con materiais que chegan de fóra o problema foi incluso peor.
