A mesa de transporte público, reunida este martes por primeira vez e con presenza de todos os grupos do Concello, comezou a estudar a proposta de redeseño de liñas exposta polo grupo Monbus. Unha proposta que se asumiu como documento base de traballo pero que, en realidade, non acaba de convencer nin ao goberno local nin á oposición, que agora a estudarán para expor os cambios que consideran necesarios.
Segundo explicou Rubén Arroxo, a proposta de redeseño mantén practicamente o mesmo número de liñas, aínda que para cubrir de mellor xeito a cidade aumenta ata nun 19% os quilómetros a percorrer. Ademais, reforza de xeito importante as conexións co Hula, ao incluír As Fontiñas e Fingoi, e prevé cubrir suficientemente zonas que no futuro necesitarán reforzos, como a estación intermodal.
Arroxo, no entanto, considérao só "un bo principio", pero cre que hai que pactar modificacións coa concesionaria. A principal tería que ir encamiñada a aumentar as frecuencias nas liñas fundamentais, xa que se parte da base dun bus por hora. O obxectivo sería coordinar as oito liñas que atravesan a cidade de norte a sur para que a frecuencia se reducise a quince minutos.
Tamén cre que é posible variar outras dúas rutas das propostas para deixar mellor servizo ao polígono das Gándaras.
Ademais, o tenente de alcalde ve imprescindible que se poña a funcionar o sistema informático para que os usuarios poidan ter información actualizada sobre a situación dos autobuses.
Convocouse unha nova reunión para setembro.
A súa principal crítica reside na frecuencia de liñas, que Ameijide cre que deberían ser de entre 10 e 15 minutos nas máis importantes.
De calquera modo, o concelleiro popular valorou positivamente a reunión da mesa de traballo e anunciou que participarán nela de xeito construtivo para chegar a acordos.
