A Palloza, un dos establecementos de hostalería máis coñecidos de Lugo, está nestes momentos pechado e o seu titular, Ramiro López, explicou este xoves que non decidiu aínda se retomará a actividade do local ou se optará por cesar a actividade alí definitivamente.
Ramiro López explicou que a situación segue sendo moi complicada para o sector, dado que aínda non está claro se este verán poderase traballar con normalidade.
Mentres a actividade está bloqueada, as empresas seguen tendo que pagar o cento por cento dos impostos e de gastos como a luz, o que complica enormemente a viabilidade económica, recalcou o empresario lucense.
López indicou que está á espera, entre outras cousas, de saber como poderán ser as vodas esta tempada. "é posible que haxa algo máis de actividade que o ano pasado, entre outras cousas porque os noivos están aburridos xa de cambiar tanto de datas, pero en realidade non sabemos aínda como será o verán", precisou.
Ante a difícil situación que vive o sector tras máis dun ano de duras restricións polo covid-19, López sinalou este xoves que "quizais haxa que tomar medidas, pero aínda non hai nada determinado".
Sinalou esas posibilidades unha vez que o peche, de momento temporal da Palloza, causou estrañeza en moitos lucenses, o que levou a moitos a pensar que era de forma definitiva.