Os lácteos son un dos produtos lucenses con mellor saída actualmente nos mercados chineses. Un destes artigos, as tarrinas de queixo da marca Quescrem, coáronse nunha das imaxes da crise do coronavirus que se viralizou ao incluíla o xornal The Guardian na súa selección de fotografías da semana.
Na curiosa instantánea obsérvase unha parella asiática vestindo chuvasqueiros de plástico con capucha, máscaras, luvas e lentes de protección mentres fan a compra no interior dun supermercado de Beijing. Se se fai zoom na parte superior dereita da foto, entre os estantes das neveiras distínguense as tarrinas de queixo da empresa lucense.
O comercio lucense con China resiste a pesar da crise internacional polo Covid-19. Entre as empresas de referencia está Quescrem, que vende á potencia asiática entre o 15 e o 20% da súa produción. "Ao comezo da crise, non o notamos e non houbo ningunha comunicación nin das distribuidoras nin das navieiras, pero segundo avanzou a crise si empezou a haber algunha afectación", explican na empresa.