Vecinos e transeúntes quixeron mostrar publicamente as súas queixas polo que consideran un paso de peóns "moi perigoso" na Volta da Viña. Segundo explican, os peóns que atravesan a calzada polo polémico paso de peóns atópanse con que, ao outro da rúa, non hai beirarrúa, polo que teñen que seguir camiñando pola estrada, co risco que iso leva.
Ademais, cando chove, a calzada está esvaradía e resulta "practicamente imposible" camiñar pola zona. "Xa caeron varias persoas en plena estrada, polo que é un milagre que ata o momento non ocorrera nada realmente grave", apuntan.
Os transeúntes explican que nesa zona conflúen diversas rúas e crúzanse os turismos que baixan da Rúa Santiago, Ronda do Carmen e República Arxentina e os que soben pola Volta da Viña. Tal e como afirman, este maremágnum de direccións está regulado por semáforos que, nalgúns momentos, permiten o paso de vehículos e peóns ao mesmo tempo.
"É un auténtico perigo cruzar polo paso de peóns aínda que o semáforo para os peóns estea en verde, xa que, cando menos o esperas, aparece un turismo circulando e pode levarte por diante. Xa estiveron a piques de atropelar a varios veciños", aseguran.
DISCAPACITADO. Os residentes da zona contan ademais que un dos veciños tense que desprazar en cadeira de rodas e xógase a vida" todos os días ao cruzar por ese paso de peóns.
Os afectados piden "á administración que corresponda" que tome medidas canto antes para atallar a situación e que revise as condicións nas que se atopa actualmente o tráfico rodado nesa zona, pola que pasan todos os días centos de vehículos.
