Queixas de falta de limpeza e de presenza de ratas no barrio da Piringalla

Os veciños do barrio da Piringalla reclaman ao Concello unha mellor e maior limpeza das rúas dada a gran cantidade de residuos que ven e tamén a presenza de ratas en varios dos viarios. Os residentes nesta zona aseguran que eles pagan "os mesmos impostos que calquera outro veciño de Lugo". Con todo, séntense moito máis prexudicados porque as rúas non están todo o limpas que deberían.

"Como veciña de Túnel de Oural, vexo que A Piringalla non recibe o mesmo trato ca outras rúas da cidade, o que me parece moi inxusto xa que, insisto, pagamos os mesmos impostos cos demais e, polo tanto, teriamos dereito tamén aos mesmos servizos municipais", afirma unha residente.

Esta muller conta que o maior problema de falta de limpeza no barrio radica, sobre todo, na esquina da rúa Túnel de Oural con Avutarda. "Aí, nese punto, os veciños estamos a sufrir unha grande deixadez por parte do servizo de limpeza e do Concello, órgano competente en manter a salubridade das rúas da cidade pois, desde hai meses, acumúlanse residuos en plena rúa, o que dá lugar á aparición de nenos de ratas", indica.