A queima de colectores nas rúas da capital lucense custou o ano pasado preto de 20.000 euros –en concreto 19.800–, segundo as estimacións realizadas polo Concello. Ao longo de 2020, as chamas calcinaron un total de 22 depósitos de lixo instalados en diferentes zonas da capital e a maior parte dos incendios foron intencionados, polo que a acción dos vándalos non resultou barata, xa que o custo de reposición de cada colector ascende a 900 euros.
Ademais, ao prezo dos colectores hai que sumarlle tamén o custo que carrexa a intervención dos efectivos antiincendios e dos servizos municipais de limpeza, que teñen que intervir cada vez que se produce un suceso destas características.
No primeiro semestre do ano, os bombeiros sufocaron incendios en doce colectores instalados en Carril dass Flores, Serra Gañidoira, Lamas de Prado, Serra de Outes, Monte Picato, Rolda da Muralla, Alfonso X O Sabio e Avenida de Madrid, entre outras, case todos en horario nocturno. Esa onda de lumes intencionados puxo en albas ás forzas e corpos de seguridade, que incrementaron a vixilancia. Así, no mes de xullo, a Policía Local detivo a un incendiario tras queimar tres colectores nun tramo de apenas 300 metros, no barrio da Milagrosa.
Naquela ocasión, o arresto do home, de 41 anos de idade, foi posible grazas á colaboración veciñal, xa que unha viandante viu como o home lle prendía lume a un depósito metálico para papel e cartón na Rúa Otero Pedrayo. A muller facilitou unha pormenorizada descrición das súas características físicas e da súa indumentaria e os axentes conseguiron localizalo pouco despois na Avenida da Coruña. Con todo, a queima de colectores continuou no segundo semestre e elevou a cifra a 22.
MAL INICIO. E se 2020 deixou un reguero de depósitos esnaquizados polas chamas na capital lucense, 2021 non empezou mellor. Só o fin de semana do 15 ao 17 de xaneiro, os bombeiros tiveron que sufocar tres incendios en colectores situados en Rúa da Illa de Ibiza e Montero Ríos
Nesta última, os axentes da Policía Nacional tiveron que desprazar un colector ata a metade da rúa para evitar que as chamas se estendesen aos vehículos estacionados nas inmediacións. As forzas e corpos de seguridade abriron unha investigación para tratar de dilucidar a autoría dos lumes.
