O PP pediu este luns o goberno local que convoque a comisión municipal de achaiadura para que dea conta de como están os traballos para aprobar o 5% do PXOM que aínda está pendente desde que en 2011 a Xunta deixouno en suspenso por falta de información hidrolóxica e de xustificación dalgúns desenvolvementos que prevía. "Levamos 23 anos de trámites dende que se contratou o PXOM, hai nove anos que se aprobou de forma parcial e levamos sete anos para emendar a solicitude da Confederación Hidrográfica sobre canles e tres anos dende que se contratou este informe", recordou o viceportavoz do PP, Antonio Ameijide, quen ademais remarcou que o Concello leva gastados polo menos 1.078.638 euros en dotar a Lugo dun novo PXOM.
"É preocupante que pase o tempo e que non haxa avances. Descoñecemos que xestións se fixeron coa información obtida e descoñecemos por que, se está feito o traballo, non se zanxa a aprobación definitiva do PXOM", sinalou Ameijide, que ademais cre que a parte do documento que entrou en vigor en 2012 xa está "obsoleto". "En moitos aspectos nin tan sequera se adaptou ás diferentes normativas urbanísticas que se publicaron dende que se aprobou. Deberiamos estar a revisar o documento e adaptándoo á realidade do municipio", afirmou Ameijide.
[Río Intre, que non estaba no PXOM. AEP]
RÍOS. Os estudos hidrolóxicos que o Concello tivo que facer a requirimento dun informe sectorial da CHMS, tras anos nos que colectivos ecoloxistas como Adega viñan advertindo de que no PXOM faltaban por recoller varios ríos, como parte do Intre, están acabados e recibiron o visto e prace do organismo de conca en marzo de 2019. Segundo o concelleiro de urbanismo sostible, Miguel Couto, estaba pendente o reflexo desa información no PXOM e espera que ese traballo estea listo este mes, como acordou, asegura, con Epypsa na reunión que mantivo en novembro coa empresa redactora do plan.
[En FIxós ía un urbanizable. AEP]
O seguinte paso será a aprobación no pleno e o envío á Xunta. Será entón cando a administración autonómica poderá levantar a suspensión e revisar todo ese 5% do documento pendente, do que, segundo Couto, non hai unha "revisión formal". O edil advirte de que aínda falta unha tramitación considerable porque, en contra do que viñera indicando o goberno local ata agora, asegura que a Xunta aínda terá que revisar esa parte do plan. "Sobre esa parte do documento non hai un pronunciamento. Non sabemos o que está ben e o que está mal", afirma.
A Xunta suspendeu a tramitación dese 5% en 2013, cando pediu estudos hidrolóxicos, pero cando en 2011 aprobou o 95% do PXOM xa fixo outras consideracións respecto da parte pendente ademais das relativas ás canles. Pedía explicacións ou máis xustificación dalgúns desenvolvementos urbanísticos (residenciais e industriais) previstos en chan rústico, como na contorna do Hula, Bocamaos, Fixós, Bosende e Muxa, algúns moi polémicos.
A Xunta tamén pedía correccións nuns 60 dos máis de 300 núcleos rurais existentes e que se dese máis protección a algúns terreos. O Concello fixo correccións e cambios -como a supresión dalgúns urbanizables- e en 2013 enviou á Xunta o documento revisado, salvo a cuestión das canles, razón pola que, aos poucos meses, a Xunta suspendía o prazo para resolver sobre ese 5%.
SERVIZOS AO HOSPITAL. É unha zona interesante pola proximidade á cidade e porque na contorna do Hula non hai servizos, pero a Xunta considerou que non se xustificaba suficientemente a conversión en urbanizable dunha extensión tan ampla de chan rústico.
MENOS EDIFICABILIDADE. A inclusión no PXOM da parte do río Intre implicará necesariamente unha redución da edificabilidade que se prevía inicialmente nesa zona. Tamén se ve afectada por ser zona inundable unha pequena superficie empresarial que estaba prevista na Louzaneta e a área de expansión dun núcleo rural.
