jueves. 20.02.2020 |
El tiempo
jueves. 20.02.2020
El tiempo

PSOE e BNG rexeitan o parador en San Fernando e a plataforma promuseo apraza opinar

O patio do cuartel de San Fernando. XESÚS PONTE
O patio do cuartel de San Fernando. XESÚS PONTE
Os colectivos que foron recibidos polo conselleiro debaterán unha posición ante o proxecto

A proposta de converter en parador-museo cuartel de San Fernando presentada este mércores polo conselleiro de Cultura recibiu xa as primeiras críticas por parte de representes políticos do PSOE e o BNG, que cualificaron de "deslealdade" o feito do que Román Rodríguez o fixera público antes de reunirse co Concello, actual propietario do edificio.

Con todo, desde plataforma promuseo da romanización houbo máis cautela e anunciaron que se convocará aos colectivos que a integran así como ás entidades que mostraron a súa adhesión a unha reunión antes de opinar sobre o proxecto da Xunta.

Así o manifestou o seu portavoz, José María Seijas, tras o encontro co conselleiro, a quen agradeceu o feito de convocalos só 15 días despois de solicitarlle unha entrevista.

Seijas, que tamén é presidente da Federación de Comercio, explicou que os representantes da plataforma que participaron na reunión quedaron en estudar o proxecto de parador-museo e convocar unha asemblea na que sexa explicada a iniciativa da Xunta para poder adoptar unha postura consensuada.

Aínda que o seu portavoz admitiu que na plataforma hai unha posición clara á hora de reclamar o prometido museo da romanización, admitiu que co proxecto da Xunta agora danse "diferentes posturas por fóra", polo que consideran necesario abrir un debate previo antes de adoptar unha decisión sobre a proposta da Xunta.

En cambio, socialistas e nacionalistas xa deron unha contundente resposta ao conselleiro de Cultura antes incluso de que lles fose mostrado o proxecto. De feito, o portavoz do PSOE e concelleiro de deportes, Miguel Fernández, cualificou de deslealdade "institucional" que non se convocase ao Concello para a reunión na que se presentou o proxecto para San Fernando, xa que asegura que a propia alcaldesa pediu unha reunión ao conselleiro de Cultura para falar do futuro do antigo cuartel.

"É inadmisible", apuntou Fernández, quen se preguntou como é posible que a Xunta busque dar usos a instalacións municipais como San Fernando ou o MIHL sen un contacto previo co Concello. Ademais, recordou que hai unha "aposta clara" e "unanimidade" da sociedade lucense para que se faga o museo da romanización no cuartel e sinalou que a corporación acaba de aprobar unha moción reclamándoa.

"CHISTE MALO". Máis contundente mostrouse a concelleira de cultura e vicepresidenta da Deputación, a nacionalista Maite Ferreiro, quen cualificou de "chiste malo" a proposta do parador. "É unha fuxida para adiante dun PP que está en precampaña e ao que lle falta un proxecto político para Lugo", dixo Ferreiro, quen considera unha "broma de mal gusto que veñan a dicirnos que ten que facer ou goberno local e Deputación" con San Fernando ou o MIHL.

A nacionalista instou ademais á Xunta a cumprir "os compromisos con Lugo" entre os que citou a finalización do plan Paradai, a entrega ao Concello do novo auditorio ou o museo da romanización en San Fernando.

Lara Méndez: "Obecede á improvisación da Xunta ante a inminencia de a campaña"
A alcaldesa de Lugo, Lara Méndez, afirma que a proposta da Xunta "obedece á improvisación coa que está a traballar" o Goberno galego ante a inminencia da campaña para as eleccións autonómicas, para "xustificar que ten unha folla de roteiro" para a cidade, "cando non a hai".

En declaracións aos medios de comunicación, a rexedora precisou que se no seu momento pensouse que o cuartel de San Fernando podía ser transformado nun parador no canto de acoller a sede do Museo da Romanización, o Concello de Lugo non se gastou "2,5 millóns de euros de todos os lucenses" para logo devolverlle a propiedade a un dos ministerios do Goberno de España. 

Ademais, lembrou que en Galicia hai "13 paradores, pero só un abre todo o ano", polo que se preguntaba se o que pretende a Xunta é ter "un edificio pechado" en pleno centro da cidade, e se está disposta a "gastar dez millóns de euros de diñeiro público" para poñer o inmoble en mans de "un xestor privado". "A alguén lle entra na cabeza que o Museo da Romanización poida estar fóra do centro histórico", engadiu Méndez.
Ferreiro trasladará propostas para eses cinco millóns 
Ferreiro informou este xoves de que lle trasladará ao conselleiro Román Rodríguez propostas para "investir os cinco millóns de euros que ten previstos" para este municipio.

A edil de cultura e vicepresidenta da Deputación tirou de ironía e agradeceulle ao conselleiro a súa vontade, "por fin, de investir en Lugo eses cinco millóns de euros".

Con todo, aproveitou para expresar a súa sorpresa por ese anuncio, porque "é estraño que o conselleiro e a Xunta non conten coas administracións de Lugo á hora de decidir en que se van a investir eses fondos na cidade".

PSOE e BNG rexeitan o parador en San Fernando e a plataforma...
Comentarios