O secretario xeral do PSdeG na provincia de Lugo, Álvaro Santos, asegurou este venres que os socialistas están "moi tranquilos" en relación coa situación xudicial da alcaldesa da capital lucense, Lara Méndez, aínda que "preocupados" polas "dilacións que se están producindo" no proceso, que leva o Xulgado de Instrución Número 1 de Lugo, o que dirixe Pilar de Lara.
En declaracións aos medios de comunicación, afirmou que resulta "curioso" que a alcaldesa leve máis tempo esperando para declarar ante o xulgado do que tardou en cumprir a sentenza por cuxo suposto atraso na execución foi imputada como investigada por malversación.
Confía en que os motivos que levaron ao Xulgado a suspender en dúas ocasións a declaración da alcaldesa estean "sobradamente xustificados", pero aínda así pensa que "non deixa de producir certa dúbida sobre o funcionamento das institucións que velan polos nosos dereitos".
Ao seu xuízo, produce "certa indefensión".
