O Partido Socialista de Galicia pedirá na Cámara galega que a Xunta elabore un plan para garantir que os empregos nas empresas afectadas polo incendio do polígono lucense do Ceao se manteñan no futuro.
Avanzouno este venres o secretario xeral do PSdeEG, Gonzalo Caballero, nunha visita á zona, onde recordou que a Xunta ten as competencias en materia industrial. Acompañado pola alcaldesa, Lara Méndez, o socialista tendeu a man ao presidente da Xunta e ao conselleiro de Industria para que todas as iniciativas que se poidan levar a cabo para dar futuro ás empresas afectadas conten co "apoio" do PSdeEG.
Caballero destacou ademais a "total involucración" do goberno municipal de Lugo e da Deputación cos afectados polo incendio do pasado domingo, sobre o que constatou que os investigadores "aínda necesitan tempo" para aclarar a orixe.
Aproveitou a súa visita a Lugo para trasladar o agradecemento dos socialistas galegos aos bombeiros, policías e demais persoal de emerxencias que desde o domingo estivo pendente dun lume que "puxo en risco o polígono do Ceao". "Son heroes que defenden as nosas propiedades, as nosas vidas en momentos de enorme dificultade e hoxe queremos comezar esta visita recoñecendo o traballo que fan e poñéndoo en valor", indicou.
Máis información: O incendio do Ceao segue sen estar extinguido
Ademais, agradeceu á alcaldesa de Lugo a súa "dedicación" e o estar "en primeira liña" coordinando a xestión para evitar que o incendio "fose a maiores". "O polígono industrial do Ceao é un pulmón industrial para Lugo e para toda a provincia", subliñou Caballero.
EVOLUCIÓN. A rexedora agradeceu a preocupación mostrada polo secretario xeral do PSdeG desde a xornada do domingo, na que se iniciaron as chamas. Ademais, dixo que os efectivos de emerxencias traballan agora para humedecer a zona, tendo en conta que o lume está controlado pero "non apagado". "Queremos apagalo para minimizar todos os perigos que poida haber", apuntou.
Tamén deu conta de que na tarde deste venres empezaron os labores de derriba dalgunhas naves, tras o que os propietarios terán que analizar que queren facer de cara ao futuro. Así, comentou que algún propietario pensa en aproveitar para ampliar a zona de produción e almacén da súa empresa e trasladar a outro lugar o punto de venda.
Dito isto, Méndez incidiu en que é o momento de intentar desde as administracións "ser áxiles" e poñer todos os mecanismos a disposición dos afectados para tratar de colaborar con eles "o máximo posible e intentar recuperar a normalidade".
Na visita estiveron tamén varios cargos do PSdeG, como o presidente da Deputación de Lugo, José Tomé, e o secretario de Organización, José Antonio Quiroga.
