Un proxecto centrado na mellora do benestar animal a través de feromonas foi o gañador do premio IdeaLugo, convocado polo grupo El Progreso coa colaboración da USC e de Abanca e que destaca as mellores iniciativas emprendedoras propostas por estudantes do campus.
O traballo gañador foi presentado polo equipo BioInnovaPher, ou Bio Pher, integrado pola doctoranda en Veterinaria Paula Rodríguez e o alumno de Relacións Laborais Jesús Viveiro, que levarán 4.000 euros. As feromonas serían aplicadas a coellos aínda que os autores do proxecto afirman que este tratamento valería para outras especies.
Estas sustancias -xeralmente producidas pola glándulas sexuais e captadas polo olfacto- permitirían aumentar os parámetros reprodutivos e baixar os niveis de tensións e ansiedade, entre outros beneficios.
A idea de Bio Pher baséase na creación dunha empresa tecnolóxica que deseñe un protocolo para a identificación e caracterización de feromonas aplicables á mellora da produción e do benestar animal. O proxecto naceu a raíz do programa Argos, unha iniciativa da USC e da incubadora de empresas Uninova, e toma como punto de partida a tese doutoral de Paula Rodríguez, aínda que é a suma da actividade investigadora de diferentes grupos do campus Terra como Acuigen, Anatomía Veterinaria, Reprodución e Obstetricia Animal e Bioquímica e Bioloxía Molecular, así como da empresa de cunicultura Cogal e o grupo de Xenómica adscrito á universidade de Edimburgo, no Reino Unido.
Igualmente, entre os principais contactos do colectivo atópase a empresa farmacéutica Ceva, líder en vendas de produtos feromonales.
O accésit do premio IdeaLugo levoullo EsCiencia, un proxecto presentado por Romina Beiroa Rey, alumna do máster en Innovación en Nutrición, Seguridade e Tecnoloxía Alimentaria; Viviana Canosa Barbosa, que cursa o máster de Dirección de Actividades Educativas na Natureza, e Angie Garzón Rodríguez, estudante do máster de Dirección de Proxectos. As tres promotoras de EsCiencia contaron, ademais, co apoio dos profesores da facultade de Ciencias e organizadores de XuvenCiencia, Mercedes Novo e Wajih Ao-Soufi.
A idea de negocio de EsCiencia baséase no desenvolvemento, creación e comercialización de kits científicos para alumnos non universitarios. Estes kits poderíanse usar tanto en aulas como en campus de verán, museos ou diferentes espazos educativos coa idea de achegar a ciencia dunha forma experiencial, transversal e moito máis lúdica e, á vez, impulsar vocacións científicas.