As xeadas volveron deixar este mércores baixo cero a boa parte da provincia. Deixaron paisaxes espectaculares, pero tamén obrigaron a extremar as precaucións nas estradas e nas rúas.
A temperatura mínima da provincia rexistrouse en Sarria, onde se alcanzaron os 7,4 graos baixo cero. Tamén en Monforte fíxose notar con dureza a onda de frío e rexistráronse 6,8 graos negativos. Na capital, en tanto, a mínima medida por Meteogalicia foi de 4,9 graos negativos.
De novo o frío azoutou incluso a áreas costeiras e en Foz houbo 0,3 graos de mínima. A Montaña, de novo, non sufriu tanto como a zona centro da provincia e no Cebreiro houbo menos 1,8 graos, mentres que en Castro de Ribeiras de Lea, por exemplo, alcanzábanse 3,8 graos baixo cero.
O frío complicou a vida aos lucenses e moitos tiveron que empezar l
a xornada limpando o xeo acumulado nos coches, unha tarefa que non resultou nada fácil logo dunha noite de forte xeada, a segunda consecutiva de frío extremo.
A xeada prolongouse ademais durante moitas horas, xa que, aínda que saíu o sol, as temperaturas tardaron moitas horas en remontar. Con todo, a máxima que se chegou a alcanzar na capital foi, por exemplo, de 7,4 graos. Fontes e estanques xeáronse en distintas localidades, como Chantada, e tamén Lugo.
Nun momento no que a ventilación imponse en centros de traballo e en colexios e institutos, o frío fixo que a xornada fose moi dura para moitos lucenses. Familias dos alumnos que este ano teñen horario de tarde e noite en institutos da capital queixábanse das condicións tan duras nas que se están impartindo as clases estes días e ata avogaban pola volta á formación online.
