Os casos activos de covid-19 na provincia de Lugo volveron este venres a baixar, tras o repunte experimentado o xoves, e a pesar da preocupante situación na cidade de Lugo e no concello de Castroverde. En total, segundo os datos actualizados pola consellería de Sanidade con rexistros ata as 18.00 horas do xoves, na provincia hai 175 persoas coa infección activa, dúas menos que no anterior parte do Sergas.
O informe diario tamén un descenso no número de novos contaxios detectados nas últimas 24 horas, un total de 14, fronte aos 17 positivos confirmados o xoves ou os sete do mércores. Ademais, 15 persoas recibiron o alta, de maneira que xa superaron a enfermidade desde o inicio da pandemia un total de 12.685 persoas.
No que non hai variación é na situación hospitalaria. Do mesmo xeito que o xoves, un paciente permanece na unidade de coidados intensivos do Hula, e no mesmo centro evolucionan dous infectados en unidades convencionais de hospitalización.
Desde o inicio da crise sanitaria na provincia de Lugo faleceron con este virus 224 persoas, aínda que o Sergas notifica 216 ao non ter en conta os falecementos dalgúns pacientes lucenses que se produciron noutras áreas sanitarias.
