A provincia de Lugo chega ao final deste estado de alarma coa pandemia nunha situación que apunta a unha certa estabilidade, con 228 casos activos de coronavirus. Os datos publicados este sábado polo Sergas constatan que, cunha leve repunta de cinco casos con respecto á xornada anterior, a cifra é similar á dos últimos días, aínda que supera por moito a que retrataba o nivel de expansión do virus noutro final de estado de alarma, o que en xuño de 2020 abriu a porta a chamada nova normalidade. E é que a área sanitaria roldaba entón os 15 casos activos.
Lonxe deses números, a provincia afronta o final do peche perimetral da comunidade e do toque de queda con 13 novos positivos confirmados por PCR en 24 horas e con sete pacientes hospitalizados con covid, un máis dos reflectidos no balance diario do venres, porque hai un ingresado máis en Monforte. Así as cousas, alí están a ser atendidas dúas persoas e no Hula permanecen cinco, unha delas na Uci.
Desde o inicio da alerta sanitaria superaron o virus 12.097 persoas na provincia, tras notificarse 10 altas nas últimas horas, e faleceron con covid-19 diagnosticado 222 lucenses, aínda que o Sergas contabiliza só 214 ao non incluír a algúns cuxo deceso se produciu noutras provincias.