Os roubos no interior de vehículos proliferan na capital lucense e nos últimos días desvalixaron varios turismos en diferentes puntos da cidade, a maioría no interior de garaxes comunitarios.
Desde que comezou o ano, os cacos forzaron polo menos unha decena de coches que se atopaban estacionados en inmobles de Garabolos, Avenida da Coruña ou Alfonso X O Sabio, entre outras rúas. Unha das últimas subtraccións produciuse na madrugada deste martes, cando abriron un turismo nun garaxe da Rúa Alcalde Xosé Novo Freire e levaron unha tablet e un cargador dun teléfono móbil.
Esa mesma noite, os delincuentes romperon os cristais dun furgón de traballo, aparcado na vía pública, concretamente na rúa San Roque, e roubaron tres motoserras.
Estas subtraccións súmanse a outra vintena de roubos cometidos a semana pasada en turismos que se atopaban aparcados nos garaxes comunitarios de tres edificios da Ronda das Fontiñas e doutro da Rúa San Eufrasio, que están moi próximos entre si.
Hai tan só un mes, os delincuentes tamén entraron nun garaxe da rúa Río Sil e noutro da Rúa Salmón. Unha vez dentro, forzaron catro vehículos e apoderáronse de diversos artigos que os seus propietarios gardaban no seu interior. E con tan só unhas horas de diferenza, os cacos entraron de novo noutro garaxe da rúa Camiño Real e roubaron os obxectos de valor do interior dun vehículo.
A Policía Nacional investiga os roubos -aínda que non todos os afectados presentaron denuncia na comisaría- para tratar de localizar canto antes aos autores e recuperar as pertenzas subtraídas do interior dos turismos.
