As probas periciais de balística e o testemuño dos axentes da Garda Civil encargados da investigación contradin a versión que sobre o ocorrido na casa que ambos compartían no municipio de Becerreá ofreceu este mércores José Manuel Carballo, coñecido como O Chamaco, para explicar a morte da súa muller Ana Gómez, a consecuencia do disparo efectuado cunha escopeta de caza.
No transcurso da súa declaración na vista oral, que este mércores comezou na Audiencia Provincial de Lugo, José Manuel Carballo asegurou que a súa intención era suicidarse diante de Ana Gómez e da súa propia nai coa escopeta que levaba entre as mans o día autos, pero a arma disparouse accidentalmente e matou a Ana Gómez.
Con todo, os axentes da Garda Civil que este xoves compareceron na vista oral confirmaron que o disparo seguira unha "liña recta" e atravesoulle o corazón a Ana Gómez.
Precisaron que foi efectuado de cerca, a unha distancia duns 3,70 metros, probablemente desde a porta dunha das habitacións do inmoble.
Ademais, tamén aclararon que se a bala, que acabou incrustada nunha parede da casa, non fose desviada pola estrutura ósea da vítima, posiblemente teríalle causado un dano moito maior a un dos seus fillos, que sufriu feridas nun dedo e unha coxa a causa do disparo.
Na xornada deste xoves, tamén prestou declaración unha tía de José Manuel Carballo, quen declarou que nunca vira episodios de malos tratos na súa relación con Ana Gómez e incluso dixo que o seu sobriño a trataba dun modo case "infantil".
