A sucesión de casos de listeriosis desatou a inquietude cidadá, pero o fenómeno non é nin novo nin infrecuente e a mellor arma é a prevención, destacou este luns Carlos Franco, membro da Academia de Ciencias Veterinarias de Galicia e do Laboratorio de Hixiene, Inspección e Control dos Alimentos da Facultade de Veterinaria, nunha conferencia na Deputación.
Atender aos períodos de caducidade dos alimentos e non mesturar alimentos crus con outros listos para comer son prevencións básicas, subliñou o profesor.
Manter as temperaturas adecuadas dos alimentos e quentar, sempre que sexa posible, os alimentos xa elaborados son outras normas a seguir para intentar evitar a listeriosis, apuntou Franco, que interveu nun foro promovido pola Asociación de Amas de Casa Lucus e que tivo o apoio da Deputación.
Franco chamou a atención especialmente sobre a necesidade de extremar a prevención con persoas maiores e inmunodeprimidas, que son moito máis sensibles. De feito, considerou que o ideal sería que anciáns vulnerables e enfermos non consumisen alimentos precocinados.
Sinalou que hai un sistema de alertas que funciona e, sen deixar de defender os protocolos adecuados na industria alimentaria, sostivo que en parte hai máis casos coñecidos porque se xeneralizou o consumo de alimentos precocinados. Ante esa realidade de consumo, hai que extremar precaucións, dixo.
