O prego de condicións do novo contrato de recollida de lixo inclúe varias melloras no servizo, como un punto limpo móbil. Será unha especie de camión que se aparcará periodicamente en distintas zonas e ao que os cidadáns poderán levar os residuos que agora deben trasladar ao punto limpo que Urbaser ten no polígono do Ceao.
O novo contrato tamén suporá unha renovación dalgunha da maquinaria de limpeza. O obxectivo é introducir varredoras e fregadoras máis eficientes e que molesten menos. Que sexan máis silenciosas, por exemplo. "Xa estivemos probando algunha", explica o concelleiro de medio ambiente.
A necesidade de renovar os colectores tamén é perentoria, xa que moitos deles están deteriorados. Algúns teñen a tapa rota e noutros casos o pedal para levantala estragado. "Son vellos e nalgúns casos xa hai pezas que non se fabrican", apunta Piñeiro.
Por contrato, Urbaser ten a obrigación de reparar e renovar colectores, pero ata un tope anual. Algúns anos a partida é insuficiente e ten que pór diñeiro o Concello, explica o concelleiro.
Outra mellora que se estuda é o sistema de apertura dos colectores azuis, os de papel. Os actuais teñen unha ranura, con solapa, bastante estreita, polo que resulta difícil introducir o papel e o cartón. Barállase que teñan unha tapa superior que se poida abrir co cartón cidadán.
