Institucións Penais acordou o traslado desde a prisión lucense de Bonxe á salmantina de Topas de Francisco Javier Belda Fernández, de 46 anos de idade, que fai unha par de semanas presuntamente degolou á súa parella, Clara María Expósito, de 49 anos no domicilio no que residía a vítima no barrio das Gándaras.
Estaba previsto que axentes da Garda Civil realizasen este xoves esa condución. Foi o propio centro penal de Bonxe o que solicitou o traslado debido ás continuas ameazas de morte que estaba a recibir o presunto homicida das Gándaras por parte doutros internos.
Francisco Javier Belda ingresou na prisión de Bonxe o pasado día 12 orde do titular do xulgado de instrución número 3 de Lugo, especializado en violencia de xénero, tras acollerse o detido ao seu dereito a non declarar.
Nos dez días nos que estivo ingresado no centro penal de Outeiro de Rei, o presunto homicida permaneceu a maioría do tempo na enfermería. Aplicáronlle o protocolo antisuicidio e o seu comportamento foi bo, como na outras ocasións nas que estivo encarcerado
Tras desmontar a súa coartada, a Policía Nacional detiña a Francisco Javier Belda o pasado día 8 na casa dos seus pais, que se atopa a apenas 250 metros de distancia do domicilio no que acabou coa vida da súa parella, sito na Rúa da Ferradura.
O cadáver de Clara María Expósito, que tiña dous fillos, un deles menor de idade, fora localizado a noite anterior pola súa nai. Atopábase no cuarto de baño. Presentaba unha coitelada no pescozo.
Á espera de que transcendan os resultados da autopsia, o detido recoñeceu a achegados seus que matara a súa parella unhas 36 horas antes de que fose localizado o seu corpo sen vida e que incluso pasara a noite no domicilio tras o crime.
Nesa confesión ao seu círculo máis próximo, Francisco Javier Belda explicou que o detonante foi unha discusión que estableceu coa súa compañeira sentimental. Incluso chegou a comentar que lle ofreceu a esta que elixise entre un coitelo e unha macheta para que puxese fin á súa vida.
Tras o crime, enterrou a arma homicida nunha leira que está próxima á vivenda da vítima. Ao día seguinte do seu arresto a desenterraba o can dun veciño que paseaba pola zona.
