Case 400 negocios de Lugo adheríronse xa aos Bonos Activa Comercio

O director xeral de Comercio e Consumo, Manuel Heredia, acompañado do delegado territorial da Xunta en Lugo, Javier Arias, e de José María Seijas, presidente da Federación de Comercio, presentou este mércores os Bonos Activa Comercio, unha iniciativa do Goberno autonómico que ten como obxectivo reactivar o comercio local dinamizando as vendas nos establecementos de proximidade.

O programa, que pretende contribuír a reducir o impacto económico derivado das restricións pola pandemia da covid-19 e fomentar o consumo nos establecementos de Galicia, conta cun orzamento de 10 millóns de euros cos que se prevén mobilizar 55 millóns neste sector e chegar a 330.000 clientes a través de bonos desconto de 30 euros. 

Os comerciantes interesados en adherirse ao programa poden facelo ata 15 de maio a través da web www.bonosactivacomercio.gal. Está aberto a autónomos e pemes, que deberán cumprir coas medidas de prevención fronte ao covid-19 para o que poden unirse á plataforma Comercio Seguro impulsada tamén pola Xunta.

Así as cousas, a partir do 3 de maio, os clientes poderán descargar os bonos desconto de 30 euros a través dunha aplicación móbil. O importe de cada bono irase consumindo en función do valor da compra: as compras iguais ou superiores a 30 euros terán un desconto de 5 euros, mentres que ás compras iguais ou superiores a 50 euros correspóndelles un desconto de 10 euros.

LUGO. Manuel Heredia aproveitou a presentación do programa para animar aos comerciantes polo miúdo da provincia a sumarse a esta iniciativa e avanzou que, polo momento, xa se adheriron en Lugo un total de 374 comercios. O comercio téxtil polo miúdo é a tipoloxía que conta cun maior número de establecementos adheridos a esta campaña.