O premio Aresa distinguirá de novo, como vén facendo nos últimos 20 anos, as propostas máis innovadoras e que máis contribúen ao benestar de quen viven no rural. O presidente de Aresa, Álvaro Rodríguez Eiras; a adxunta á presidencia, Carlota López e a vicerreitora do campus da USC en Lugo, Montserrat Valcárcel, presentaron este martes a actual convocatoria, para a que se poderán presentar candidaturas ata o 25 de outubro.
Rodríguez Eiras recordou este martes que o obxectivo do galardón non variou en todo este tempo e que segue sendo contribuír a mellorar a vida no rural galego e frear a desertización. "Para iso, agricultores e gandeiros só teñen un camiño: producir mellor, con máis calidade e seguridade para que os seus produtos poidan chegar a mercados exteriores", explicou.
O presidente de Aresa, convencido de que o campo cada vez será máis atractivo para emprender e vivir, recordou que o premio axudou á súa firma e á USC a coñecer o traballo de moitas empresas. "No curso destes anos obtivemos o beneficio engadido de chegar a industrias e compañías das que non tiñamos coñecemento e que nos sorprenderon gratamente pola súa modernidade e aposta pola investigación", asegurou.
Pola súa banda, Carlota López recoñeceu como "sorprendente" e "moi positivo" o éxito conseguido polo premio desde a primeira edición, tanto no que se refire ao currículo dos premiados como á difusión. "Chegamos a esta edición con enerxías e coa necesidade de facelo cada vez mellor para manter ese éxito", dixo.
A vicerreitora de Coordinación do campus en Lugo botou a vista atrás para destacar o carácter innovador do premio desde os seus inicios. "Hoxe o desenvolvemento rural está en todas as axendas políticas pero hai 20 anos era unha cousa moi nova", explicou Valcárcel, que tamén destacou que se trata de algo de vital importancia para unha provincia como Lugo e unha comunidade como a galega. "Foi Aresa quen tivo a visión de algo que hoxe é básico, que é buscar unha mellor vida para as persoas do rural", dixo a vicerreitora da USC, universidade que colabora co galardón.
O premio volve estar dotado con 10.000 euros e, como é habitual, pódese encadrar nas categorías de proxecto de actividade empresarial, actividade empresarial innovadora ou traballo de I+D+i.
Poden optar ao galardón desde empresas, asociacións ou grupos de investigación ata particulares que aposten polo desenvolvemento da economía rural da comunidade galega.
