O Premio Aresa de desenvolvemento rural ten asegurada a súa vixésima edición. O prazo de presentación de candidaturas permanecerá aberto ata o 25 de outubro e pódese facer tanto nos rexistros da USC como nas instalacións do grupo Aresa.
O obxectivo deste galardón, que cumpre 20 anos, é premiar diferentes iniciativas e proxectos presentados por empresas, grupos de investigación, asociacións ou calquera outro tipo de entidade que contribúa á mellora do benestar das persoas que viven e traballan no medio rural.
Na firma do convenio de colaboración que pon en marcha a edición do ano 2019 do Premio Aresa participaron o reitor da Universidade de Santiago de Compostela, Antonio López, e o presidente do grupo Aresa, Álvaro Rodríguez. No acto, celebrado no salón reitoral do Colexio de San Xerome de Santiago, estiveron tamén presentes Montserrat Valcárcel, vicerreitora de Coordinación do Campus de Lugo, e Carlota López, adxunta á presidencia de Aresa.
Tras a sinatura, López e Rodríguez explicaron que na avaliación das futuras candidaturas o xurado prestará especial atención aos proxectos que xeren valor engadido e emprego no rural galego, que axuden á súa viabilidade económica, á promoción dos produtos de terra de tradición galega, á recuperación de subsectores agrícolas e gandeiros tradicionais e á innovación en produtos que teñan potencial de desenvolvemento.
VALORACIÓNS. O reitor da USC afirmou que este premio "é unha iniciativa chamada a ter éxito, xa que encaixa coa nosa realidade máis próxima e cun sector estratéxico para Galicia". Álvaro Rodríguez agradeceu á USC polo apoio recibido e resaltou "o propósito da empresa por prolongar este acordo por moito tempo".
