O PP buscará no pleno municipal deste mes o compromiso do goberno local para que abra as instalacións deportivas dos colexios polas tardes, fóra do horario escolar, para que poidan ser utilizadas por clubs deportivos e particulares.
Trátase dunha vella demanda, xa que a oferta actual de instalacións deportivas é insuficiente e está copada por clubs e equipos federados, que adoitan disputalas. Ademais, hai cidadáns que tampouco atopan facilidades para practicar deporte de equipo de forma informal sen ter que acudir a pistas privadas.
"Hai mozos que adoitan ir a Montirón a xogar ao fútbol, pero se o campo está ocupado, e xúntanse varios, pagan a escote e vanse a pistas privadas como as de Conturiz", explican no PP.
Hai cidadáns que pagan para facer deporte en pistas privadas por lecer ou por saúde
Os populares volven expoñer agora esta carencia porque o Concello non aproveitou a ocasión que se lle deu de solicitar á Xunta poder usar pavillóns de institutos fóra de horario lectivo. A Administración galega e a Fegamp subscribiron un convenio marco mediante o cal os concellos tiñan que solicitar o uso destes espazos nos institutos correspondentes antes do 30 de setembro. Segundo explica o concelleiro do PP Óscar Poy, o Concello tiña intención de pedir o pavillón e as pistas de atletismo da cidade cultural (por detrás do IES Lucus Augusti), "pero non o fixo".
O edil cre que a razón é que o Concello tería que ter persoal nas instalacións nese horario, pero apunta que podería optar polo que fixeron o Club Voleibol Emeve e a Federación Galega de Atletismo, que xa usaban estes dous espazos e solicitáronos de novo á Xunta ao non facelo o Concello. Cada entidade nomeou un responsable das instalacións, explicou Poy.
Dada a necesidade de dotacións deportivas, o PP insta o Concello a sacar o máximo rendemento ás súas, como poden ser os pavillóns dos colexios Luis Pimentel, A Ponte, Paradai e Manuel Mallo Mallo.
RÉPLICA DO CONCELLO. O concelleiro de deportes, Mauricio Repetto, explicou que o Concello non se adheriu ao convenio marco porque lle implicaría ampliar o contrato municipal de limpeza das instalacións deportivas, adoptar fórmulas de copago do gasto eléctrico e dotar cada unha das dependencias de persoal para abrilas, pechalas e vixialas durante o seu uso.
O Concello proxecta a construción dun novo pavillón polideportivo na zona norte
Como alternativa, Repetto explicou que o Concello está a preparar un convenio coa Xunta para asumir o polideportivo e as pistas de atletismo da cidade cultural e poñelas a disposición de clubs locais, por ser os únicos equipamentos autonómicos que se axustan ás demandas dos equipos federados, di. Na práctica este uso xa se está facendo.
Repetto tamén recorda ao PP que a Xunta é copropietaria do antigo pavillón da OJE, no centro da cidade e que debería poñelo a disposición dos cidadáns.
NOVO PAVILLÓN. O Concello proxecta a construción dun novo pavillón polideportivo na zona norte, na Rúa Veiga Grande, preto de Infanta Elena e o futuro barrio ecolóxico.
O proxecto está feito e a Deputación e a Xunta están dispostas a cofinanciar a obra, pero o acordo económico non está pechado nin a obra está contratada.
